01/04 09:12
أفضل طريقة لخسارة الوزن هي اتّباع ريجيم صحي متوازن..
دي الجملة اللي بنردّ بيها على كل أصدقائنا اللي بيبعتوا يسألونا عن أحسن طريقة للتخسيس، وفعلاً دي أحسن وأفضل وأصحّ طريقة للتخسيس..
لكن بعض أصدقائنا بتقابلهم مشكلة إنهم مابيقدروش يواظبوا على نظام الريجيم، وده بيخلّي استجابتهم للريجيم تتأخر، ويرجعوا يشتكوا إنهم مش بيخسوا، وإن الريجيم مش بيجيب معاهم نتيجة.
علشان كده النهارده هنقدّم لكم 10 قواعد صحّية بسيطة بتساعد في الانتظام على الريجيم من غير ما تحسّوا بالتعب أو الإرهاق أو الملل من الريجيم..
بس قبل ما نبدأ كلامنا لازم نعرف إن الريجيم الصحي هو أسلوب للحياة لازم نعتاد عليه، علشان نعيش حياتنا بشكل صحي بعيد عن السمنة والأمراض..
والريجيم الصحي هو نظام غذائي يمدّ الجسم بكميات كافية من كل العناصر الغذائية اللازمة للجسم واللي بتمدّه بالطاقة، علشان نقدر نمارس أنشطتنا اليومية بشكل طبيعي..
ودلوقتي تعالوا نتعرّف على التغييرات اللي ممكن تعملوها على نظامكم الغذائي علشان يبقى صحي أكتر..
1- الفطار.. وجبة لا يمكن إهمالها
الفطار هو الوجبة الأولى اللي بتمد الجسم بالطاقة اللي بنحتاجها علشان نكمّل اليوم بعد فترة انقطاع عن تناول الأكل أثناء الليل، علشان كده لازم تبقى وجبة صحية ومتوازنة؛ لكن بعض الناس بتكسل إنها تاخد وجبة الفطار أول ما تصحى من النوم، وده اللي بيخلّيهم يحسّوا بجوع فظيع وشراهة للأكل أثناء اليوم، والأفضل إننا ناخد وجبة الفطار بدري أول ما نصحى من النوم.
2- التنوّع في الأكل.. لريجيم ممتع
لازم نحاول دايماً إننا نجدد في نوع الأغذية اللي بنحصل عليها خلال اليوم، وعلى الأقل نحصل على 20 مادة غذائية صحية ومختلفة خلال اليوم، علشان نتأكد إن الأكل اللي بنحصل عليه بيحتوي على نسبة معقولة من المواد الغذائية المختلفة اللي بتحتوي على الفيتامينات، والأملاح المعدنية اللي بيحتاج لها الجسم، والطريقة دي كمان بتخلّينا نحس إن الريجيم ممتع ومش ممل.
3- تسوّق وفق خطة معينة
اكتب قائمة بالمشتريات اللي إنت محتاج لها قبل ما تنزل تتسوق، وحاول على قد ما تقدر إنك تلتزم بالقائمة دي، وماتشتريش حاجات أكتر منها، وتجنّب تماماً إنك تتسوق وإنت جعان؛ لأنك أكيد هتشتري حاجات مالهاش لازمة لمجرد إحساسك بالجوع.
4- الاهتمام بشرب الميه.. لريجيم من غير تعب
الميه بتمثل 2/ 3 وزن جسم الإنسان، علشان كده مش لازم ننسى إننا نهتم بتناول كميات كبيرة من الميه والعصاير الفريش أثناء اليوم، علشان نحافظ على صحة جسمنا سواء كنا بنتّبع ريجيم أو لأ؛ لأن كمان نقص كمية الميه في الجسم بيسبب الجفاف اللي بيخلّينا نشعر بالجوع والتعب والإرهاق والدوخة وجفاف الجلد، وبعد كده نرجع نجيب اللوم على الريجيم.
5- البروتين والكربوهيدرات.. للتقليل من الإحساس بالجوع
الجمع بين الأكلات اللي بتحتوي على بروتينات وكربوهيدرات بنسب معينة، بيمد الجسم بالكمية اللي بيحتاجها من الطاقة؛ لأن الجسم بيحوّل المواد دي ببطء إلى جلوكوز، وده بيقلل نسبة إفراز الإنسولين، وبالتالي بيقلل من قدرة الجسم على تخزين الأكل على صورة دهون.
6- استخدم طريقة 80/ 20
ناس كتير بتشوف إن الالتزام بالعادات الغذائية الصحية، محتاج لطاقة وإرادة كبيرة جداً، وده صحيح فعلاً؛ لأن التعوّد على نظام الأكل الصحي بيحتاج لوقت؛ خصوصاً بعد ما اتعوّدنا لفترة طويلة على الأسلوب الخاطئ في الأكل.
وعلشان تتغلب على المشكلة دي؛ فالموضوع مش هيحتاج غير شوية مرونة؛ يعني لو مش هتقدر تلتزم بالريجيم والنظام الغذائي بنسبة 100%، فممكن إنك تحاول الالتزام بها بنسبة 80%، والنسبة دي هتحقق لك التوازن في حياتك، وهتخليك تحسّ إنك حر ومش مقيّد ومرتبط بضوابط معيّنة، وفي نفس الوقت هتقدر تتكيف مع العادات الصحيّة في أغلب الوقت، لإحساسك إنك مش بتعمل حاجة مجبر عليها.
7- الرياضة.. ركن أساسي من أركان الريجيم
لا علاقة لها بالحب والكره؛ فسواء كنت تحب ممارسة الرياضة أم لا؛ فالريجيم الصحي لازم تكمله بممارسة بعض التمارين الرياضية، لو كنت فعلاً عايز تحقق نتايج على الميزان.
وعلى أقل تقدير، يجب ممارسة التمارين الرياضية لمدة 30 دقيقة 3 مرات أسبوعياً، والخبر الجيد إنك تقدر تعتبر الأنشطة العادية اللي بتعملها خلال اليوم (زي تنظيف البيت أو طلوع ونزول السلم أو غيرها من الأنشطة اليومية) جزء من الوقت الخاص بممارسة الرياضة؛ لكن بشرط إنها تكون أنشطة بتبذل فيها مجهود يجعلك تنهج وتتعرّق.
8- خذ وقتك في كل وجبة
أخذ الوقت الكافي في تناول الطعام، مش بس مفيد لصحة المعدة والجهاز الهضمي؛ ولكنه أيضاً يتيح للجسم الفرصة للإحساس بالشبع والامتلاء.
فالدراسات تقول: إن الجسم يحتاج لحوالي 20 دقيقة، قبل أن يبدأ في الشعور بالرضا والشبع؛ لذلك تأكّد دائماً أنك تأخذ وقتاً كافياً في تناول كل وجبة.
9- تجنب تناول الطعام في ساعات متأخرة من الليل
ناس كتير بتّتبع في حياتها أسلوب في الأكل، وهو إنهم ياكلوا أي حاجة طول النهار، وياخدوا وجبتهم الأساسية والدسمة بالليل بعد ما يرجعوا من الشغل.
طبعاً ده أسوأ نظام ممكن يتّبعه شخص عايز يقلل وزنه ويوصل للوزن الصحي المناسب؛ لأنك بالطريقة دي بتحرم جسمك من الأكل في الفترة اللي بيبذل فيها أقصى مجهود خلال اليوم، وبتقدّم له الوجبة الأساسية قبل وقت النوم، وبكده السعرات الحرارية اللي بيحصل عليها مش بتتحرق وبتتحول لدهون تتخزّن في الجسم.
والأفضل إنك لو ماشي على نظام غذائي تلتزم بالوجبات الموجودة فيه، ومافيش أي مشكلة إنك تاخد وجبة الغداء كل يوم وتاكلها في الشغل في وقت الراحة، ولما ترجع البيت تاخد وجبة العشاء على الساعة 6 أو 8 بالكتير، وتكون حاجة خفيفة ومش دسمة؛ يعني ممكن وجبة العشاء تكون عبارة عن كوب زبادي وثمرة فاكهة.
10- قلّل من السكريات.. بالتدريج
حاول على قد ما تقدر تقلل من تناول الحلويات والأطعمة اللي فيها نسبة سكريات كبيرة، وأحسن طريقة هي إنك تقلل كمية السكريات في أكلك تدريجياً، وتبدأ تراعي نسبة السكر اللي بتحصل عليها خلال اليوم وتكون حذر جداً للمكونات اللي بتاكلها خلال اليوم، ومع الوقت هتلاحظ إن رغبتك في تناول السكريات والحلويات قلّت جداً.
ولازم تعرف كويس إن تقليل السكر، مش مفيد بس لتقليل الوزن؛ ولكنه مفيد للصحة بشكل عام، وكمان علشان تحافظ على أسنانك من التسوّس.
وفي نهاية عددنا النهارده..
نتمنى إن النصائح اللي قدّمناها تكون مفيدة ليكم..
وتساعدكم إنكم تخسروا وزنكم بسهولة وصحة..
إلى اللقاء،،،
أنا 75 كيلو وفرحي بعد شهرين وضعيفه جدا قدام الأكل والحلويات خاصه وبمل من الرجيم مش عارفه اعمل ايه؟ أرجووووكم رد وبسرعة
وشكرااا على مجهودكم الأكثر من رائع السلام عليكم ورحمة الله وبركاته.
===========
رد بص وطل:
أهلا بيكي صديقتنا العزيزة وشكرا ليكي على ذوقك ونتمنى إن المعلومات اللي بنقدمها تكون بتفيدك فعلا، وبالنسبه لسؤالك فالحل بسيط جدا وفي ايدك إنتي، وهو إنك تقنعي نفسك إن الريجيم ده مش معناه حرمان من الأكل أو تعذيب ليكي، لكنه تعديل في عاداتك الغذائية الغلط اللي كنتي بتعمليها واللي ممكن انها -لا قدر الله- تسبب لك مشاكل صحية بغض النظر عن الناحية الشكلية والجمالية، وبعد كده الموضوع هيبقى سهل أهم حاجة أنك يكون عندك الإرادة والعزيمة إنك تحققي اللي إنتي عايزاه، وبالنسبة للحلويات ابدئي قللي منها بالتدريج يعني ما تحرميش نفسك منها مرة واحدة، وكلي بكميات صغيرة منها، وحاولي إنك تستبدليها باكل الفاكهة، وإن شاء الله مع الريجيم وممارسة الرياضة زي المشي أو الجري أو أي رياضة تحبيها، هتقدري توصلي للوزن المثالي، وتكوني في فرحك زي القمر.. مع تمنياتنا ليكي بالتوفيق في حياتك اللي جايه.
أنا طولي 180 ووزني 95 الزيادة كلها في بطني وجنابي وافخادي وعندي ترهل في بطني ومش عارفة اعمل اية ياريت تساعديني.
============
رد بص وطل:
الحل في خطوتين إنك تمشي على ريجيم صحي متوازن مع ممارسة التمارين الرياضية لأن مفيش ريجيم بيخسس منطقة معينة في الجسم، الريجيم بيخسس الجسم ككل، كمان الرياضة بتشد الجسم وبتعالج موضوع الترهلات ومع المواظبة عليها وعلى الريجيم هتحصلي على الجسم المثالي اللي بتحلمي به.
السلام عليكم أنا وزنى حاليا 85 وطولى 170 ونفسى اوصل لحتى 75 بس المشكلة انى جسمى مش بينزل لانى عملت ريجيم وكنت خسيت 20 ك ورجعت تخنت تانى ورجعت روحت جيم وخسيت 16 ك ووصلت ل85 مشكلتي إن كل حاجة عندي بتخس ما عدا الجناب وبطني وأنا فرحي كمان أسبوعين ونفسى اخس واخدت أعشاب كتير بس مفبش فايدة فياريت حد يقول لى اعمل ايه قبل الفرح وكمان انا ارادتى بتضعف لما مش بلاقى نتيجة واسفة على الاطالة.
============
رد بص وطل:
الصديقة العزيزة.. إزاي بتقولي مش بتلاقي نتيجة وإنتي قدرتي تخسي 20 و16 كيلو، المشكلة بس هي إنك لما بتوصلي لمرحلة معينة بتتوقفي عن الريجيم وده اللي بيخلي جسك يرجع مرة تانية للوزن السابق، والحل إنك تتابعي دايما مع دكتور متخصص علشان يقدر يديكي النظام الغذائي المناسب مع كل مرحلة بتوصلي لها، وطبعا مع المواظبة على ممارسة التمارين الرياضية علشان تحافظي على جسمك من الترهل وتتخلصي من مشكلةالسمنة الموضعية.
يا جماعه انا وزنى 69 وحاولت اقلل أكلي لكن مفيش فايدة مش راضي يخس أكتر شىء مضايقني البطن اخسسها إزاي.
============
رد بص وطل:
صديقتنا العزيزة يا ريت تبعتي لنا طولك علشان نقدر نعرف إنتي محتاجة تخسي أد ايه بالظبط، وعامة الموضوع مش محتاج منك إلا أنك تمشي على ريجيم صحي متوازن مع ممارسة التمارين الرياضية حتى ولو كانت تمارين بسيطة زي المشي والجري وطلوع السلم.
ازيك يا رانا انا كنت عايزة اعرف أنا وزني 65 وطولي 161 وأنا عايزة انزل من وزنى شوية ومشكلتى فى الجزء اللى فوق من الجسم الاكتاف والبطن والصدر وعملت رجيم ونزلت بس برجع تانى ولما بنزل من وزنى بنزل من تحت مش من فوق كنت عايزة اعرف اعمل ايه.
===========
رد بص وطل:
أهلا بيكي يا مي، وزي ما بنقول دايما علاج السمنة الموضعية هي ممارسة التمارين الرياضية الخاصة بشد عضلات المنطقة اللي فيها السمنة علشان تحرق الدهون اللي فيها، وعموما إنتي مش محتاجة تنزلي كيلوات كتيرة، يعني كل اللي عليكي إنك تظبطي أكلك وتروحي الجيم وتواظبي على التمارين الرياضية.
ازيكم يا جماعه انا كنت عاوزة استفسر عن حاجة أنا وزني 73 وطولى 162 وعاوزة اخس ضرورى لان فرحى قرب وخصوصا منطقه البطن مع العلم ان الحركه مش كتيره ممكن اعرف حل سريع ويجيب نتيجه بسرعه مع العلم ان نزولى بيبقي ببطئ شكرا وسورى ع الاطاله اتمنى الاقي رد بسرعه.
===========
رد بص وطل:
صديقتنا العزيزة.. مش لازم نزول الوزن يكون سريع لأن كل جسم وله طبيعته، ومعدل الرحق بيختلف من شخص لآخر، كل اللي عليكي إنك تمشي على ريجيم صحي متوازن وتتأكدي إنك بتنفذي كل التعليمات بدقة، مع ممارسة التمارين الرياضية، وأهم حاجة إنك ما تفقديش الأمل بسرعة، لأن طبيعي جدا إن جسمك بالفطرة هيقاوم الريجيم، لكن مع الوقت والصبر والمواظبة هتحققي النتيجة اللي إنتي عايزاها.
السلام عليكم.. أنا عايز انزل جامد في شهر بالكتير وأنا وزني تقريبا 98 وطولى 185 ونفسي اظبط جسمي يا ريت تقولوا لي الأكلات والمواعيد واعمل ايه وشكرا.
==========
رد بص وطل:
الصديق العزيز.. لازم تمش يعلى نظام غذائي تحت إشراف دكتور متخصص علشان يديك النظام الغذائي المناسب لطبيعة جسمك، وأهم حاجة ممارسة التمارين الرياضية حتى ولو كانت تمارين بسيطة زي المشي أو الجري.
انا وزنى 61 وطولى 160 انا عارفه ان وزنى ماشى مع طولى بس مشكلتى ان فيا جناب وبطن ومش عايزه اخس غير ف دول بس قولي لى اعمل ايه شكرا.
==========
رد بص وطل:
حل المشكلة دي هو ممارسة التمارين الرياضية بانتظام حتى ولو كانت رياضة المشي وطلوع السلم لان التمارين دي بتحرق الالدهون في منطقة البطن والارداف ولكن مع الانتظام والمواظبة، وممكن كمان تشتركي في نادي رياضي (جيم) علشان تعملي التمرينات تحت إشراف مدرب متخصص وأهم حاجة إنك تحافظي على اكلك وتاخدي بالك إنك ماتاكليش بالليل وإنك تتعشي حاجة خفيفة لأن الأكل الدسم بالليل بيعمل بطن.
هاي يا قمري أنا طولى 156 ووزني 68 وعندي أكتر حاجة مخلياني تخينة هى البطن والجناب وممكن اقعد طول النهار مش اكل حاجه بس بحب قوى السكريات وبروح النادى العب فى الجيم باستمرار وابتديت اقلل فى السكريات بس حاسه مفيش نتيجة بليز قولي لي اعمل ايه وثانك يو الك.
=========
رد بص وطل:
الرياضة هي أحسن حل للسمنة الموضعية لكن الموضوع بيحتاج لوقت ومواظبة على التمارين الرياضية وإنك ماتزهقيش وتفقدي الأمل بسرعة وطبعا إلى جانب اتباع ريجيم صحي متوازن.
انا قرات حاجات مفيده جدا بس انا عندى سؤال انا وزنى 78 ك وطولي 160 والزيادة عندي في البطن والأرداف ممكن تقول لي على نظام اتبعه في انقاص الوزن من غير دكتور.
============
رد بص وطل:
بالنسبة للسمنة الموضعية فدي حلها إنك تمشي على ريجيم مع ممارسة بعض التمارين الرياضية علشان تشد العضلات وتحرق الدهون في مناطق جسمك اللي الدهون متركزة فيها، وده لينك لريجيم ممكن تمشي عليه لكن الأفضل إنك تروحي لدكتور علشان يديكي نظام غذائي مناسب لطبيعة جسمك ولحالتك النفسية، وده لينك الريجيم
انا كان وزنى قبل الحمل 58 كيلو ووصلت أثناء الحمل لـ 80 كيلو وبعد الولادة القيصري وصلت 68.5 كيلو بس مش عارفة اخس عن كده والسمنة متركزة عندى فى منطقة الوسط والفخذين اعمل ايه خصوصا انى مش عندى وقت العب رياضة ولا ينفع امشى على ريجيم بس عاوزاكم تقولوا لى ابعد عن ايه في الاكل.
==========
رد بص وطل:
الصديقة العزيزة مفيش مشكلة في إنك تمشي على ريجيم في فترة الرضاعة، بس الريجيم لازم يكون متوازن يعني تنزلي بالكثير 4 كيلو فى الشهر، مع إضافة بعض الزيوت، ولبن خالى الدسم، وورقيات، وفاكهة، وسوائل كثير، وده لينك لريجيم مناسب لفترة الرضاعة، وممكن تعملي بعض التمارين الرياضية الخفيفة زي المشي وممكن تعتبري الأعمال المنزلية وطلوع السلم من التمارين الرياضية.
السلام عليكم.انا وزنى زاد جدا بعد الولاده التانيه ويمكن كمان عشان المرتين الولاده كانت قيصرى وتقريبا وزنى وصل ل94 وانا اصلا وزنى 72 وطولى 167 بقالى فتره بشرب شاى اخضر ليبتون ووزنى وصل بعد شهرين 89 عايزه اعرف الشاى الاخضر فعلا ليه تاثير على الرجيم وبيضر فالرضاعه ولا لاء؟
=================
رد بص وطل:
الشاي الأخضر يدخل تحت مسمى المواد التي لها تأثير محدود أو غير مؤثر في الريجيم، لكنه غير مضر وله فوائد تانية لا يمكن تجاهلها زي احتوائه على مواد مضادة للأكسدة ومهم لزيادة المناعة، لكن تأثيره في موضوع الريجيم لا يستحق أن أعتبره من أدوية الريجيم سواء أقراص أو شاي
انا عندي 13 سنة طولي 154 وزني من 60 الي 85 كجم حاولت اعمل ريجيم اكتر من مره ونجحت في مره وخسيت بس انا بحب الحلويات اوي كان عندنا فرحين في يومين متتالين فكلت فتخنت تاني وحاولت تاني السنة دي ونجحت وخسيت بس تخنت تاني شوية وبعد كده حفظت علي وزني بس نفسي اخس باي شكل من غير دكتور
=================
رد بص وطل:
صديقتنا العزيزة.. كل اللي انتي محتاجه له شوية ارادة وعزيمة وانك تاخدي موقف مع نفسك وتقرري انك توصلي للوزن الصحي علشان تحافظي على صحتك وشكلك، وده مش هيحصل الاباتباع ريجيم صحي موازن مع ممارسة بعض التمارين الرياضية وممكن تبدئي في اجازة الصيف وده لينك لريجيم ممكن تمشي عليه
ازاي ازيد خمسه كيلو انا رفيعه أوي ساعدوني بليز احتاج 5 كيلو واكون وصلت الوزن المثالي.
===========
رد بص وطل:
حاولي تكثري من الاكلات اللي فيها سعرات حرارية عالية زي العسل والحلاوة، وتابعي دايما وزنك على الميزان ومع ممارسة التمارين الرياضية وزنك هيزيد بس لازم تتاكدي مفيش عندك مشاكل عضوية هي السبب في نقص وزنك زي الانيميا او مشاكل في الغذاة الدرقية او اي سبب عضوي تاني -لا قدر الله- وكمان لازم تعرفي ان علاج النحافه بيحتاج لوقت اكبر من علاج السمنة لانك بتبني جسمك.
اولا احب اشكركم جدا وانا متاكدة ان الشكر ده لا يوفى حقكم وربنا يجزيكم خير ويجعله فى ميزان حسناتكم
ثانيا انا كنت 86 والحمد لله خسيت 10 كيلو وبقيت 76ومبنزلش عن كده وانا طولى 1.74 المهم دلوقتى انى نفسى اوصل للوزن المثالى يعنى على الاقل ابقى 70 بس المشكلة انى بعد ما خسيت بقيت السمنة عندى موضعية فى الارداف مش عارفة اعمل ايه ؟
بحاول العب رياضة على قدر المتاح يعنى بعمل تمرين شد عضلات للرجل وتمرين شد عضلات البطن وبنزل واطلع السلم كتير جدا يعنى ممكن 50 مرة او اكتر فى اليوم ومع ذلك انا ثابته مع العلم انى مش باكل كتير ولو اكلت باكل اكل الريجيم ولما بزهئ بفتح فى الاكل من الياس
==============
رد بص وطل:
أولا احب اشكرك صديقتنا العزيزة على كلامك الجميل، لأن كلامكم ده هو اللي بيشجعنا دايما، وكمان عايزة احييكي على نجاحك في الريجيم وانك قدرتي تنزلي 10 كيلو من وزنك بالاراده والعزيمه، بس كل اللي بطلبه منك انك تكملي المشوار اللي بدأتيه واللي خلاص قربتي تنجزيه وتحققي اللي انتي عايزاه، كل اللي عليكي انك تغيري النظام الغذائي اللي انتي ماشيه عليه لان ساعات الجسم بيتعود على نظام معين وبيبدا يقاومه علشان كده لازم تستشيري الدكتور المتابع لحالتك علشان يديكي نظام غذائي جديد وفقا لاحتياجات جسمك، بس اهم حاجه انك تفضلي مواظبة على التمارين الرياضية، وبلاش تزهقي وتفقدي الأمل علشان ما تخسريش كل اللي حققتيه.
اسم دكتور كويس للتغذيه فى اسكندريه
هى الرياضه فعلا ممكن تخلى الخطوط البضاء اللى فى الارداف والصدر تروح ولا لا
===========
رد بص وطل:
طبعا التمرينات الرياضية بتساعد جدا على شد الجلد وبيخلي البشرة رايقة وشكلها فيه صحة وحيوية، ومع المواظبة على التمرينات والحفاظ على وزن الجسم الخطوط دي هتختفي مع الوقت ان شاء الله وممكن تستشيري دكتور جلدية متخصص علشان يوصف لك بعض الكريمات الطبية اللي تساعد على سرعة اختفائها.
السلام عليكم انا بشكركم على الموضوع الرائع ده بس انا والده من 7 اشهر وعايزة اعمل ريجيم وخايفه ع الجرح ابدا الريجيم ولا استنى قد ايه انا والده قيصرى.
===========
رد بص وطل:
مفيش مشكلة انك تبدئي الريجيم مع الرضاعة بس لازم يكون تحت اشراف دكتور متخصص علشان يديكي نظام غذائي صحي ومتوازن يوفر لجسمك كل اللي بيحتاج له في الفترة دي، ولازم الريجيم يكون فيه خضراوات ورقية ومنتجات ألبان.
بجد معلومات رائعةلريجيم بس بجد لو حد عاوز يخس انا ممكن اساعدة بطريقة صحية جدا
ريجيم ايه ده انا لو عملت ريجيم هختفي من الحياه
ههههههههههههههههههههههههههههههههههههههههههه
انا عايزه اسم برشام كويس للريجيم.
============
رد بص وطل:
الأفضل للتخسيس إنك تمشي على نظام غذائي صحي وتغيّري عاداتك الغذائية الخاطئة وتتعودي على العادات الصحية، ولو فعلا جسمك محتاج لمساعدة بالادوية لازم الدكتور المتابع لحالتك هو اللي يقول لك على الدواء المناسب، وماتنسيش اهمية ممارسة التمارين الرياضية.
كلامك جميل جدا ولكن لي سؤال هل صحيح بذور الرجلة مفيدة لانقاص الوزن؟ شكرا ليكم علي المجهود الرائع.
============
رد بص وطل:
شكرا ليكي صديقتي العزيزة على ذوقك واتمنى أكون قدرت افيدك فعلا، وبالنسبة لبذور الرجلة او ألأعشاب عموما فهي ممكن يكون لها فوائد كتيرة لكن بالنسبة لموضوع التخسيس فهي بتمنع امتصاص الكثير من المواد الغذائية وبالتالى قد تساعد على فقدان الوزن ولكنها قد تضر الجسم.
انا عايزه نظام ريجيم ااقدر امشى عليه أنا وزنى من 80 إلى 85 كيلو بليز محتاجة رد ويا ترى امشى مع دكتور ولا في الجيم عادي على نظام الكابتن تديهولي وشكرا.
==========
رد بص وطل:
