10/25 04:11
كتير من البنات بيعانوا من مشكلة الاطراف المتقصفة ، وتقصف الاطراف دي علامة ان في مشكلة كبيرة في صحة شعرك ، وان كان قص اطراف الشعر يعتبر واحد من من الحلول لمشكلة تقصف اطراف الشعر ، ولكن اكيد مش هنحب اننا نفقد من طول شعرنا في كل مره نقصه ، طيب ايه هو العلاج المثالي للاطراف المتقصفة واللي ممكن يحط حد للمشكلة؟ النهاردة هنقولك على افضل زيوت لعلاج اطراف الشعر المتقصفة ، واللي هتساعدك على تنعيم الشعر واستعادة وتغذية اطراف الشعر الباهتة والتالفة.
طريقة استخدام الزيت بطريقة صح:
قبل ما نعرف افضل الزيوت لعلاج اطراف الشعر المتقصفة ، اتعرفي الاول على طريقة استخدامه ، الزيت الطبيعي ممكن يبقى علاج فعال للشعر لو عرفتي تستخدميه بالطريقة الصح.
– اول حاجة اختاري نوع الزيت المناسب ليكي من القايمة اللي هنعرفها دلوقتي مع بعض ، واتأكدي انك ماعندكيش حساسية منه ، باختباره في مكان صغير الاول ، ولو بتستخدمي زيت عطري قبل استخدامه اتأكدي من خلطه بزيت ناقل لتخفيفه.
– اغسلي شعرك بالشامبو وجففيه بالفوطة.
– خدي كام نقطة من الزيت ، وافركيها في راحة ايدك ، وبعدها وزعي الزيت من نص الشعر للاطراف.
– سيبي الزيت على شعرك مدة كافية لحد ما الشعر يتشرب الزيت كويس.
زيت الزيتون بيحتوي على مكونات ترطيب قوية ، زي حمض الاوليك والسكوالين ، عشان كده هو فعال جدا لتنعيم وترطيب اطراف الشعر المتقصفة ، كمان الاستخدام المنتظم لزيت الزيتون بيساعد على منع ظهور الاطراف المتقصفة عن طريق الحفاظ على مرونة ورطوبة الشعر.
زيت شجرة الشاي كمان واحد من الزيوت اللي ممكن تساعدك على علاج اطراف الشعر المتقصفة ، الاضافة لعلاج الهيشان والتلف ، زيت شجرة الشاي بيرطب الشعر وفروة الراس ، بيمنع القشرة ، بيقلل من الاطراف المتقصفة والتالفة ، كمان بيزود من نمو الشعر بشكل صحي ، بالاضافة انه بيتحكم في انتاج الزيت في فروة راسك بالتالي هو مفيد جدا للشعر الدهني ، ممكن تمزجي زيت شجرة الشاي مع اي نوع من الزيوت الحاملة المختلفة قبل استخدامه على شعرك.
