07/10 13:31
المصيف وتجهيزاته كلنا كل سنة في موسم الصيف بنبقى شايلين هم تجهيزات المصيف وشنطة السفر وايه الحاجات اللي لازم ناخدها والتجهيزات الاساسية, وايه الحاجات اللي مش ضرورية ومالهاش لازمة وبتاخد مكان على الفاضي معانا, ده غير بقى الحاجات اللي بننساها وبعد ما نوصل نكتشف اننا نسيناها ونفضل قعدين متضايقين, عشان كده احنا النهاردة هنقولكم ازاي تجهزي نفسك وشنطتك للمصيف بكل بساطة عشان تروحي المصيف والبحر وانتي مبسوطة وريلاكس ومن غير اي مشاكل وتقضي وقت حلو.اول خطوة قبل المصيف بكام يوم على روقان كده هنجيب ورقة وقلم ندون كل حاجة احنا عايزين ناخدها معانا عشان منبقاش ساعة التجهيز متعصبين ومستعجلين لان هو ده اللي بيخلينا ننسى حاجات.قسمي الورقة دي تلات اقسام قسم فيه الحاجات الاساسية اللي هتستخدميها في البيت, وقسم للحاجات الشخصية اللي انتي هتستخدميها لنفسك, والقسم التالت للاطفال لو عندك اطفال. الحاجات الاساسية للبيت مهمة جدا انك تاخديها معاكي لانك هتروحي مكان انتي بتبقي مش عارفة حاجة فيه ومش لسه بقى هتدوري على اماكن او تسألي وتدوخي نفسك عشان كده الحاجات دي لازم تحطيها معاكي في الشنطة.هتحطي شنطة اسعافات اوليه صغيرة فيها قطن وشاش ومطهر جروح وبعض الادوية اللي ممكن تحتاجي لها زي برشام صداع مثلا او برشام مغص, ومقص, ابرة وخيط, فوط كفاية كبيرة وصغيرة لانها اكتر حاجة بنستخدمها في المصيف والبحر, ملايات سرير, كوفرتة, ليفة, فرش السنان, ومعجون السنان, اكياس بلاستيك “زيبلوك” عشان تحفظي فيها السندويتشات وانتي رايحة البحر او حتى الكاميرا والموبايل عشان تحافظي عليهم من الرملة والمية, وممكن علب لحفظ الاكل عشان تحطي فيها اي بواقي اكل او تاخدي فيها اكل للبلاج, ترمس شاي, كولمان مية,فتاحة للعلب,كراسي البحر,ولاعة اوكبريت, كوبايات واطباق بلاستيك, شوك ومعالق وسكاكين, ممكن ناخد باكيتات اي مشروبات زي الشاي والنسكافية والشاي الاخضر واي مشروبات نفضلها, اكياس بلاستيك كبيرة عشان تحطي فيه الهدوم المبلولة لما تروحي البلاج وتكون بعيد عن اي حاجة تانية في الشنطة او تستخدميها تحطي فيها الزبالة, وممكن تاخدي العاب زي الكوتشينة, او الطاولة, او الشطرنج اي حاجة للترفيه على البحر او في السهرة. دي الحاجات اللي تخصك انتي, اول حاجة واهم حاجة في حاجتك الشخصية هي الصن بلوك عشان تحمي بشرتك من الشمس, وكريم مرطب, كريم او زيت شعر, سيروم للشعر, شامبو, بلسم, مزيل عرق, شنطة المكياج اللي هيبقى فيها كل مكياجك اللي هتستخدميه خلال فترة المصيف, زبدة كاكاو, بونية للشعر, كاب او برنيطة, مراية صغيرة, ونضارة الشمس, فوط صحية, شبشب للبيت, بنس شعر, توك, مشط, صابون, غسول البشرة, مناديل معطرة “ويبس”, برنس,والفلوس الموبايل طبعا ممكن بينك وبين نفسك تقولي دول مستحيل انساهم بس مع الاستعجال ممكن تنسي اهم الحاجات– لو في اطفال متنسيس تكتبي الحاجات الخاصة بيهم والافضل تخصصي شنطة للاطفال غير شنطتك عشان هيحتاجوا حاجات وهدوم اكتر لانهم بيوسخوا ويستهلكوا لبس اكتر, اكتبي هدومهم للبلاج والخروج والنوم, وشباشب وجزم, وفرش السنان, والمشط, وتوك الشعر للبنات, وملابس داخلية, ليفة وفوط خاصة بيهم, والشامبو الخاص بيهم, والعوامات الكبيرة, وعوامات الكتاف, ونضارة السباحة, والكاب, والعاب البحر زي الجاروف والجردل وكورة البحر, مضارب راكيت, كورة طايرة, يعني كل الحاجات الترفيهية اللي محتاجينها.– لو الطفل لسه بيبي يبقى متنسيش الادوية بتاعته عشان تبقي عاملة حسابك على اي حاجة, والبامبرز, واللبن الخاص بيهم, والسيريلاك, وزودي طبعا من الهدوم والملابس الداخلية عشان بيحتاجوا يغيروا كتير, بافتات, قطن للودان, بطانية او لحاف صغير, عربية البيبي, غلاية مية او كاتيل عشان تحضري اكل البيبي.بالنسبة للبس حاولي على قد ما تقدري انك متاخديش كمية هدوم كتير يعني خدي على قد ما تحتاجي في الكام يوم بتوع المصيف ومتاخديش حاجة مالهاش لازمة وتاخد مكان في الشنطة على الفاضي.– طبعا اول حاجة المايوة, وبالنسبة لهدوم البلاج اختاري طقمين مثلا خصصيهم للبلاج يكونوا فستان, او جيبة وبلوزة, او بنطلون وبلوزة حسب اللي بتفضليه اكتر, والافضل انهم يكونوا الوان فاتحة عشان تعكس اشعة الشمس وتكون خامتها قطن او كتان عشان تبقى مريحة ومتحرركيش.– اختاري كام طقم بقى غير طقمين البلاج اللي بيتبهدلوا في الرملة والبحر لخروجاتك بالليل بعد البحر ما بين الفساتين والجيبات والبنطلونات, وطبعا للمحجبات متنسيش الطرح ودبابيس الطرح ويفضل الطرح بردوا تكون خامات مش بتحرر زي القطن.– هدوم النوم متاخديش هدوم كتير لان تقريبا كلنا مش بنام في المصيف واخر حاجة بنفكر فيها النوم فمتكتريش منهم اوي.خدي معاكي حاجات خفيفة وعملية عشان متتعبش رجلك وتبقي مرتاحة, يعني الصبح على البلاج البسي سابوه او فليب فلوب ده هيبقى اكتر حاجة مناسبة للرملة والبحر, ولخروجاتك التانية غير البلاج البسي الجزم الفلات الخفيفة او بردوا الحاجات المفتوحة هتبقى انسب للمصيف.خدي معاكي شنطة ايد كبيرة عشان تلمي فيها كل حاجة وانتي رايحة البلاج زي الصن بلوك, والفوطة الخاصة بيكي وبونية الشعر, ونضارة الشمس, والافضل يكون نوع الشنطة من الخامات اللي ضد المية او الانواع اللي ممكن تتغسل عشان تتحمل معاكي بهدلة البحر.بعد ما كتبنا كل الحاجات اللي هناخدها نبدأ نشوف الحاجات دي موجودة عندنا في البيت ولا نقصنا حاجة مش موجودة عشان ننزل نشتريها وتكون جاهزة ليوم السفر.قبل يوم السفر هتبقي طبعا كاتبة كل حاجة هتاخديها معاكي وجهزتي كل حاجة واشتريتي كل اللي ناقصك هيبقى الموضوع بقى سهل جدا عليكي كل الحكاية انك هتحطيهم في الشنطة بس من غير ما تبقي مستعجلة ولا متعصبة.– في ليلة السفر بالليل بقى جهزي السندويتشات اللي انتي هتاخديها معاكي في طريق السفر وممكن تكوني مجهزة كمان وجبة اول يوم عشان هتوصلي هتكوني تعبانة من السفر مش لسه هتجهزي اكل او تدوري على مكان اكل يبقى يادوب بس تسخني الاكل اللي معاكي وتسهلي الموضوع على نفسك.نتمنى اننا نكون غطينا كل الحاجات المهمة اللي محتاجينها في المصيف ودي تقريبا الاساسيات اللي كلنا بنحتاجها ممكن بعض البنات يحتاجوا اضافات او حاجات تانية زيادة حسب احتياجاتهم, اكتبوها مع الحاجات اللي احنا كاتبينها لما تيجوا تجهزوا عشان متنسوهاش.
